[定の影評]《無敵貓劍俠》- 笑到噴水的合家歡賀歲電影

阿定

上星期去了睇首影，由於實在太忙，今日先有時間寫番份 REPORT 比大家，一向對港產片興趣不大，而又對卡通片情有獨鐘的我，新年有兩套戲我係高度關注的，一套係宮崎駿父子的紅花板上的海，另一套就係呢套由夢工場製作的《無敵貓劍俠》，有睇過史力加的朋友都應該認識呢隻貓仔「皮靴貓」的了，真係有幾可愛，有幾可愛，喜歡貓的朋友就一定要入場睇，對貓興趣不大的朋友我都會推薦你入場睇，因為成套戲，笑料不絕，一浪接一浪，最適合新年當賀歲電影睇的了！

先講講呢套戲係 3D 的，雖然有唔係 3D 版，不過除非接受唔到 3D，否則推薦睇 3D 版，因為呢套卡通 3D 做得幾好，3D 效果唔係為 3D 而 3D，而係戲情好多位都要用3D來交代距離感，你會欣賞到不少淺景深的場境，同功夫熊貓 2 比，睇得到製作公司有不少進步，不過如果你對畫質有要求，呢套戲就有少少失色，d 貓毛無史力加時期咁細膩，不過 who care？ 呢套係笑片來的，好笑有趣才是重點！

套戲有幾好笑，我無理由戲透的，但有幾樣野可以比大家參考，首先，配音的係《黑俠梭羅》型男安東尼奧班達拉斯，佢把聲真係好鬼 MAN，好鬼型，但配合有時扮可愛的貓仔樣，又或可愛貓仔樣情深深咁扮有型時，你一定會從心裡笑出來，而正如剛剛所講，時而有型，時而可愛，加上有歌舞助興，細路仔睇得開心，大人亦睇得過引，而其中有不少戲情係亂來的，例如唔應該好勁的野，變身成好勁的野，應該好緊張的戲情，原來一 d 都唔緊張，亂到我自己都唔知自己講咩，但入場睇你就會明架啦，戲入面其中一個笑位，全場除左無人唔笑外，我仲聽到幾個大男人笑到拍手掌，同埋有人笑到氣咳，以卡通片來講，交足功課有突的了！

角色方面，除左男主角超有型之外，女主角同樣有型得很，由初初調戲男主角，到後來愛上男主角，唔係果貓樣的話，我以為睇緊愛情喜劇，而壞蛋角色亦非常好笑，話佢蠢，佢又唔係，但好多低能行為，實在係估你唔到，如果睇粵語配音的話，呢個咁鬼馬的角色係由張智霖配音的，不過我個人習慣聽原裝配音，而且《黑俠梭羅》把聲亦係呢套戲的其中一個賣點，不容錯過！

講左咁多，講到好似善稿咁，不如留番比大家自己睇吧，今個新年，比錢去睇 3D 動作片，不如比錢睇套 3D 卡通片開心下吧，起碼唔會好似果套講光合作用的咁，個個睇完都係 Facebook 媽媽聲！

電影詳細介紹: 《無敵貓劍俠》Puss In Boots - 1 月 21 日 貓賀新禧

P.S.: 下期影評如無意外係紅花板上的海，好難得買到日語原音的戲飛，個人十分期待呢！

ewartuen

上個禮拜飛機上面睇左, 反而覺得好悶, 可能佢實在跟住Shrek個模式去做, 完全無驚喜, 連D笑位都照炒多穫, 個薯蛋頭個造型唔單只唔討好, 直頭黑我憎, 可能我真係越黎越無童真啦!

liclic

我都係飛機上睇左，不過不失。

命硬好人

多謝影評~
但3D呃錢戲可免則免~
出Blu ray 會考慮~


- 發送自我的 iPhone 大板凳應用

yk0823

本來想入戲院睇..朋友睇完話麻麻..都係等買美版或港版BD..算了!!

qqsnk

Watched on the plane also....Really copy Shrek style!

radhk

>> 我都係飛機上睇左，不過不失

x2