豪無深度的Onkyo 607 版聚後感 上集

阿定

廢話唔多講，要睇相去番大會專用帖子睇吧，有睇過阿定分享文章朋友，應該知道我寫野係好主觀，如果你係想睇專業評測，一大推數據的，以下內容絕對不適合你！

首先，今次版聚的主角係 Onkyo 607，小弟之前一直用緊Onkyo 605，當607係美國開售後，就賣左605，一直在等607行貨，可惜最後都係等佢唔到，所以買左其它AMP，今次有機會比我親身感受Onkyo 607，實在非常難得，未見 Onkyo 607 之前，佢最吸引我就係 607 有 倍線1080i 的功能，呢個功能對於會抽時間玩 Wii 的我，十分之有用，雖知道DVD可以買內置1080P輸出，又或用 PS3 的 倍線功能，但 Wii 呢類只有 480P 的遊戲機，就只能靠 AV AMP 先做到倍線，之前605 倍線 Wii 到 720P 時我已經發覺畫面有所進步，可惜就是只支持 4:3 ，無 16:9 功能，非常可惜！而607另一個吸引我的地方，就係前1後5的HDMI輸入端子，先講數量，後面5個相信足夠我未來所需，一部PS3、一部XBOX360、一部BDP、一部機頂盒，一部PC，正常生活，我個人覺得最少要有4組，現在有六組，前置的HDMI，更加可以比你日後數碼相機同數碼攝錄機即時接駁之用，今次Onkyo可說是真正了解用家的需要

好啦，上面的資料基本上唔去版聚都知的，唔多講啦，講講今次主打的Pro Logic IIz吧，相信好多人地方明明有限，5.1已經足夠，但成日想整埋7.1的吧，無論你目標係為型，人有我有都好，7.1呢個數字對於已經有5.1 或已經接觸過5.1的朋友應該都有吸引力吧！今次Pro Logic IIz 比我感覺係把原本7.1的前三後四，改為前五後二，兩隻前置正上方再加多兩隻衛星，前五後二做出來的層次感，以我今次版聚坐得比較後來講，你會聽到前面好遠的聲音同前面唔係好遠的聲音係唔同的，簡單d講，你會分到對面馬路有人講野，同你前面的人講野，係有距離上的分別的，再進一步的感受，就係由遠至近的感覺啦，相信配合埋晝面，你睇睇下戲，晝面突然有野飛埋來，配上Pro Logic IIz，你應該會好低能地係屋企做出閃開的動作，而坐得比較前的版友所講，落雨聲從上而下都會聽得出，呢d都係Pro Logic IIz先做到的效果吧，雖然我坐得後，完全感受唔到，再有機會，我一定會早d入場，揀番個皇帝位再試！ 講到呢度，提提大家， Pro Ligic IIz 唔係 Onkyo 獨家的，聽完唔駛即刻 Fade Out 其它牌子鎖定購買 Onkyo 607，始終作為抽唔中 Onkyo 係版聚期間送出的 Blu-Ray 試機碟的我來講，實在係有責任提醒大家其它牌子都有Pro Logic IIz 的！

好啦，我地回頭講番 Onkyo 607 呢部機吧，版聚時我地見到，一部 Onkyo 607可以推得到7隻B&W，力水夠，相信唔駛比咩數據大家吧，我可以誇張d 講一句，如果你停留係低階AMP係唔夠力的遠古時代，我可以話你知，Onkyo 607 夠晒大部分版友用有多的了，除非你屋企接受過更上一層樓訪問，又或者你家的Speaker係講緊十幾萬一隻，間影音房大過正常人的廳，否則買部 Onkyo 607 已經好夠力，咁當然，你想要更細膩的聲音，低階的Onkyo 607絕對唔夠你用，呢個亦係一個事實，今次好多版友都對Onkyo AMP 改觀，入面有Onkyo老用戶，亦有其它品牌的用家，都對Onkyo 607有正面的評價，以一個唔係人人有禮物收，大部分人都空手而回來講，係好難得評價係一面倒的正面的！

我地來講番標題吧，豪無深度的意思，當然唔係講 Onkyo 607 的聲底同功效啦，係講緊佢的體積，深度比以往 Onkyo 605 比，少左好多，跟據Onkyo負責人所講，線路重新排位，所以慳回不少空間，呢一Part對於香港人的地櫃只用來放影音設備來講，係一大喜訊，今時今日 LCDTV就算唔上牆，放地櫃上面都唔會佔你好大地方，越深的地櫃就越阻地方，當電視唔再影響地櫃的深度的年代來講，AMP 的深度就好決定你的地櫃有幾深，地櫃少一寸，等同果廳多一寸，從地產角度計，Onkyo 607 可以幫你提升左你間屋的實用率，實在值得一讚！至於部機熱唔熱，我只能答你係今次版聚的冷氣房入面，我答你唔熱，你都唔會信吧，不過用手去碰，事實亦唔會覺得佢暖，相信實際係家居環境都唔會熱得去邊，而且學Onkyo負責人所講，你有幾何見有人部AMP係熱過頭熱壞的！

至於Onkyo 607 係打機方面，小弟被放上XBOX 360的 SF4 任人魚肉的情況下，負責人都試過轉換過幾次 Game Mode 比大家試聽，如果我無記錯的話，Onkyo 今次係為左打機設置左幾個Mode的，其中有為RPG、格鬥及FPS、Rock(Rock Bank Music果類)、運動(NBA2K、FIFA、WE之類)，在這我就唔多講啦，因為版聚只係試左兩場SF4，而且大家都好熱鬧，都聽唔到d咩出來，而未來的日子我應該再有機會係另一個場合試到Onkyo 607 配搭 XBOX306 的，所以就留待下集再講吧！

注:本文謝絕轉貼，版權屬本人阿定所有，未得同意轉貼，視同盜文！

阿定

沙發留給唔知有無的下集用！

forumboy

講得好詳細.....



下次記住帶埋個私家joystick黎..唔好再讓round... (講笑)

阿定

好慘，360果掣真係唔適合打SF4，雖然我相信換左joystick都唔會贏到，但起碼唔會唔知自己係度做咩

里奧

打 SF4 只用 JOYPAD .... 好難啵 , 真係會乜都出唔到 ~

maner394

講得好詳細.....



下次記住帶埋個私家joystick黎..唔好再讓round... (講笑)
forumboy 發表於 2009-6-12 10:38

好詳細清楚佈告

post76funfun

好詳細呀, 睇完就好似自己都有親臨現場既感覺

raycheng77

阿定兄寫得好！

快o的出埋下集啦

Btw, 你 Wii 入 amp 係用色差線入？

我都打算 wii 入 amp 倍大 1080~~~~

阿定

阿定兄寫得好！

快o的出埋下集啦

Btw, 你 Wii 入 amp 係用色差線入？

我都打算 wii 入 amp 倍大 1080~~~~
raycheng77 發表於 2009-6-12 11:15

係呀，仲換左 MONSTER CABLE 添，呵呵！

hintel

好詳細report, 而且可以見到阿定兄真人(我都是你啲信徒)