Conductor+LCD X 試玩報告 - 最好的，或許不是最美的

甜鬆潤

前言

“首先非常感謝76既版主們盡心盡力咁舉辦今次既活動，小弟有幸被選為首個測試人員，真係萬分榮幸。”
依句本身一開頭就係諗住咁寫，話晒76都借野比我玩，當然係唔係都要多謝下佢，其實本身都只係屬於禮貌上講句，但係。。。。

當我係版主手上接手依兩袋野：今次既主角，Burson Conductor+Audeze Lcd X 既時候，我先知道，依個感謝，係必需既。

大哥，唔洗重到咁呀。我由交收地點到我既工作地點相距大約只有10-15分鍾既路程，平常黎講依一段路程其實非常輕鬆，但係今日真係要中途停低休息下(係，我係體虛力弱），好在今日天氣唔算太熱，如果唔係真係大件事，真係不難想像版主為左令我地依班試玩人員又借機又送機會有幾辛苦，係到請讓我再次真心感謝76盡心盡力咁去舉辦今次既活動。

不過話時話，部機重我可以理解。唔洗連隻LCD-X都重到咁呀。

你地睇下個盒？？

唔打開以為裡面擺緊係係個炸彈


我過一間打開既時侯有少少覺得自己好似職業特工隊，個箱實在似帶去參軍多過聽歌。
LCD X 果然非常重。急不及待即刻駁入部Prime到試試。
無睇錯，唔係Conductor，係Prime。

令我諗起細個有套卡通片叫電腦警察，打個電話就會有個武器箱送黎。
唔知大家有無睇過哪~



Mac + Audirvana Plus + Meridian Prime + Audeze LCD X

睇過唔少關於Meridian Prime係外國論壇既Review，好多位人兄都話LCD X非常夾機（無錯，我借機係充滿私心既），咁當然要先用熟識既器材測試一下，認識一下佢既聲音先。

一戴上個頭到，咩事？洗唔洗咁重？

先以Abraxas 既第一首歌 01-Singing Winds, Crying Beasts 黎試聽先。

樂器定位非常唔錯，立體感空間感都係我聽過最利害既一隻耳機（利申：我聽過既大耳機唔多），聲音並唔係清澈如水既感覺，但係就有非常好既音樂感，整體性格比較熱情，樂器既演繹非常清析，就算係一d音樂比較混亂既位置，你都可以好明確咁聽到每樣樂器既表現，估唔到第一隻歌已經有咁唔錯既表現。

第二首係Torun Eriken Visits 既第一首歌 01-Beat Angles 。

三頻既表現都有相當既水準，高頻唔算特別，Base亦算結實有力，位置亦相當唔錯（一陣再詳細講對我黎講位置既意思）。
但係，人聲缺乏感情。

我再以謝安琪既 01-我們都忘了 測試。
結果亦非常類似，人聲的確並唔吸引，並唔係話夠唔夠前既感覺，而係人聲缺乏左生命力既感覺。
依可能係Prime+LCDX既相性問題，但係暫時黎講，樂器定位，空間感，立體感，音場一d都唔局促，表現的確非常令人印像深刻。

不過，我已經開始有d頂唔順，隻LCD-X太重，條頸開始有d痛。

所以要進入另一階段既測試。

Mac + Audirvana Plus + Burson Conductor + HD700

我一路以為HD700非常容易配搭，但係配上Conductor，真係好出乎意料地唔夾。
無左HDVD800過種宏偉既感覺，亦缺少左Prime過種細膩感。整體聲音亦較乾，實在唔太好聽。
既然唔夾，主角又唔係Prime又唔係HD700，咁就容許小弟就咁完結哪。

主角登場 Mac + Audirvana Plus + Burson Conductor + LCD X

果然有驚人既化學作用。

音樂唔再只係一粒粒音組合而成，係Conductor+LCDX(下稱套裝）底下，每粒音都充滿佢既“動作”。
鼓聲唔係只係鼓聲，整個敲打過程都呈現眼前，琴聲再唔只係琴聲，而係由按下琴鍵到放手既畫面都非常清析，前文所講既立體感，空間感，樂器定位，係套裝底下，完全超越Prime，但係有個位奇怪，就係base既位置，上文提及過LCDX+Prime Base既位置大約係鎖骨位，但係套裝既Base竟然係個鼻到。。。認真奇怪。

以Abraxas 既第一首歌 01-Singing Winds, Crying Beasts 為例，音樂唔在只存在於LCDX當中，係充滿係整個空間。

再以謝安琪既 01-我們都忘了 測試，雨聲彷彿從頭上落下，人就在場境之中。
老實講，套裝既實力實在令我刮目相看。
鋼強而實淨，以質素黎計，真係比起HDVD800，同Prime還要強得多。
本身充滿偏見私心既我，亦都不能不承認，套裝就質素黎計比起HDVD800+HD700，Prime+K8121，還要高出一個檔位。

但係好可惜，我並唔鍾意。
質素咁高你都唔鐘意？無錯，就係唔鐘意。
就好似有d女仔，你係街到遇到，覺得貌若天仙，但係返到屋企，唔會掛住亦唔會想遇返，甚至乎只係記得自己只係見過個靚女，連樣都唔記得左，但係原因並唔係認為自己高攀唔起，而係有時候，

最好的，不一定代表最美的。

我實在係不能滿意依個套裝，雖然暗地裡讚歎，但係奈何，係我試聽套裝期間，我未能有一首歌能真正投入地去聽過。套裝將所有Background Music 都推晒出黎，並分拆，並完美地演譯，感覺就好似一味宮保雞丁，將雞肉，腰果，萵筍，辣椒分開煮，然後每樣都係主菜咁呈上，話需每樣配菜都值得品味欣賞，但係就令我忽略左整道菜。套裝令依個情況尤其明顯，尤其係聽人聲為主既歌曲，多大量學器加人聲同時演譯既時候，更會發覺其他音樂將人聲覆蓋左，而且感覺上人聲亦缺乏張力，感情不足，可以用薄聲黎型容人聲既表現，同時，亦缺乏左過種整體性。

或者其實只係因為個人問題，歌曲既種類都係一個原因，感覺上人聲亦比較缺乏感情，亦無左過種整體性。

雖然我好似評論得依套套裝好差，但係實情並唔係咁，聆聽既感覺非常悅目，有d似係imax睇緊戲，立體感，空間感，樂器定位及表現，令我覺得驚喜不斷，每一首歌曲都非常有趣，某程度上黎講，我不得不承認聽依個套裝係一種非常好既享受，只係有時候，覺得好唔一定會愛，依個情況亦出現係我之前所用既AK240身上。

總結 -

依部野好足料，重到非常


或者唔好咁空泛，以Android 同 IOS 黎計，IOS人性化，但係硬件就一般，Android就硬件可以做到好強，但係操作就唔算太流暢，兩樣都有Market，但係我就係IPHONE既使用者。
就機論機，Conductor+LCDX係各層面都非常強橫，Hdvd800同Prime係依d層面都望塵莫及。
作為一個新手，我的確並無足夠資格評論一部機既質素有幾高，但係最起碼我仲可以分到鍾唔鍾意。Conductor+LCD X，小弟並不喜歡。

但係亦唔可以唔講一件事，買套裝前要三思，我多多少少因為測試依個套裝攪到我頸痛呀（LCD X真係唔係人人都用得架。。。。），76有無得clam醫藥費架？

goodabc2010

不論師兄既感想定set野都好夠份量

斯路

Audeze耳機盒雖然重同大舊，但呢個盒仔來頭唔細，講緊散買應該成2000蚊港紙。

意想唔到LCD-X同Prime係夾，不過有時侯鬼佬講野我會打個拆扣，始終佢地接觸到既器材以及出席到既音樂會機會相對未必較多。我聽過既Prime+LCD-X只可以講我未能喜歡，或者因為早年期HiFiMan參照Meridian 588為調音基準，所以我係Prime+LCD-X既組合下聽到有輕微HM-801既影子，唔算得別欣賞呢種玩法，質素唔算特別高之餘，呢個組合既染色亦稍稍太具個人主義。

LCD-X其實都幾好聲，不過好似係LCD系入面最重既一對，而且平板都實在唔係易推呢。有機會都會想試試Burson Conductor+LCD-X既組合，相信有一定互補效應。

stevenyu2000

斯路 發表於 2014-5-22 16:41
Audeze耳機盒雖然重同大舊，但呢個盒仔來頭唔細，講緊散買應該成2000蚊港紙。

意想唔到LCD-X同Prime係夾， ...

SKB 軍用箱的確係好野黎，不過話要$2000就未免多左D。

我都有個大size之SKB箱，都只係$1000多D。

Audeze 如果賣咁贵就食水深左D，唔通件海綿值成千？？

講返個箱，個扣好好開，防潮防水，very good

斯路

stevenyu2000 發表於 2014-5-22 16:56
APO 軍用箱的確係好野黎，不過話要$2000就未免多左D。

我都有個大size之APO箱，都只係$1000多D。

哎呀原來香港賣得重平，我係先排睇淘寶要1600人仔所以先話要2000蚊港紙。

stevenyu2000

斯路 發表於 2014-5-22 17:11
哎呀原來香港賣得重平，我係先排睇淘寶要1600人仔所以先話要2000蚊港紙。

淘寶代購食差價當然貴，美國货去返美國訂啦

Andykong

我反而有興趣知 HDVD8000 推 LCDX 會係點，Burson 推 LCD 我覺得太埋身，唔太襟聽!

黑翼菜鳥

斯路 發表於 2014-5-22 16:41
Audeze耳機盒雖然重同大舊，但呢個盒仔來頭唔細，講緊散買應該成2000蚊港紙。

意想唔到LCD-X同Prime係夾， ...

LCD系最重其實是LCX-XC才對

斯路

黑翼菜鳥 發表於 2014-5-22 22:49
LCD系最重其實是LCX-XC才對

實在太可怕，足足再重多50克

stevenyu2000

斯路 發表於 2014-5-22 17:11
哎呀原來香港賣得重平，我係先排睇淘寶要1600人仔所以先話要2000蚊港紙。

Go and get one in B&H Photo . 60 USD only

http://www.bhphotovideo.com/c/pr ... Std_Waterproof.html

http://www.skbcases.com/music/pr ... amp;c=153&s=152