我眼中的2015年最伏~最佳遊戲 & 2016年最期待遊戲

@肥狗仔@

隨著各大大小小的作品浪接浪地推出，2015年顯然係機迷非常忙碌的一年。當然，玩到幾多就豐儉由人，但當中總會有讓人高呼神作或者大叫中伏的作品。以下就係本人過去一年玩過，由最差至最佳的遊戲排行榜，以抒發自己心目中的15年最佳遊戲，並藉此講吓嗰啲2016年的心水作品。

2015年個人之遊戲排行榜:

17. Call of Duty Black OPS III | 平台: 多平台
經BOII一役後，開發商Treyarch仍然未意識到嗰種David Fincher式的情節根本難以同一部靠子彈帶動的遊戲相結合。



16. The Order 1886 | 平台: PS4
自古以來就有若干 — 畫面華麗﹑內容濕滯的遊戲出現，本以為《Ryse: Son of Rome》已經係當中的表表者，但一拍埋本作，前者勉強都稱得上係款好遊戲。論畫面1886絕對能獲得100分的嘉許，論內容本作卻犯上好多連學生作品都未必會犯的錯誤，而且仲要爛尾。



15. Kirby and the Rainbow Curse | 平台: WiiU
遊戲其實唔係差，只係如果玩家要一直對住個gamepad玩，咁點解唔直接做成3DS作品呢?



14. 勇者鬥惡龍 英雄集結 闇龍與世界樹之城 | 平台: PC/PS4
整體的結構與"無雙"如出一轍，但多得鳥山明所塑造的角色，還有各種生動的怪物及相關招喚系統，本作成功擺脫斬草形像。事實上若果哩一類crossover可以打響名堂的話，相信以後什麼三國/戰國無雙將會成為歷史。



13. Yoshi's Woolly World | 平台: WiiU
既然卡比走咗去砌黏土，咁織毛線的重任就留比耀西喇。自從玩完《進擊的蘑菇隊長》之後感覺都唔會有其他老任二線角色作品可以超越該遊戲的突破，當然《Yoshi's Woolly World》都難以跨越哩道高牆，我地可以見到遊戲將以往食蛋元素改為食冷球，不過新面貌亦帶黎新氣像，玩家可通過食毛線從而對地形作出改變，此舉大大提升了每一關的可玩性及深度。



12. Ori and the Blind Forest | 平台: PC/X1
假設你玩慣紅白機/超任嗰代嘅硬派作品，咁本作的難度對你黎講似食生菜。事實上遊戲的挑戰性與其美輪美奐的畫面，以及頗為感人的故事都有點格格不入，可能基於哩個原因使到本作可以喺一大堆橫向動作game入面殺出一條血路。



11. Besiege | 平台: PC
自從Steam開放咗"early access"之後玩家就可以對啲未完成的遊戲評頭品足，不過老實講市面上大把"完成品"實際上都係未整好就拎出黎賣。《Besiege》的妙在於目標簡單，但過程中玩家會不斷去實驗及推測，從而憑著一套建築力學以實淺玩家對機械工程的追求，雖然這股小宇宙最終係用於破壞。



10. Metal Gear Solid V: The Phantom Pain | 平台: 多平台
喺我嘅眼中，MGS系列早喺4代之後就已經壽終正寢，打後的系列作只係集中描寫Big Boss的故事。不過由《Peace Walk》開始遊戲嘗試打造人性化的操作方式，而及後的《Ground Zero》及本作MGSV亦以更完善的姿態亮相。可惜劇情鋪排使得故事發展極為緩慢兼且冇乜張力，而內容經常重疊嘅主線及支線任務又比人一種周而復始的感覺。此外遊戲引入開放式世界概念，但除咗部份車輛伏擊戰之外，感覺上一般行動根本好難活用到哩個元素。最大問題係當一大偏地方只容納到敵軍/動物/資源，咁各任務之間的緩沖位仲有咩意義呢。



9. Shadow Complex Remastered | 平台: 多平台
一款炒冷飯可以排到咁前除咗因為今時今日玩返仍然好好玩之外，可以免費下載已經夠抵讚。



8. Halo 5: Guardians | 平台: X1
個人對本作的失望程度實不遜於1886。那怕Halo5的多人遊戲可謂系列中最好嘅，但極為平庸的畫面表現難免令人將之與WiiU遊戲比較。幸好喺故事模式下，畫面尚算可以接受，而隨之而黎嘅係被眨到得返三關的士官長劇情。我唔排除有關決定實大智若愚之舉，話唔定10年後睇返係正確的方向，但如今睇黎將系列主角當成配角確係令人費解。



7. Bloodborne | 平台: PS4
回想當年玩《Dark Souls》的日子，感覺就好似做緊卡通片《Tom and Jerry》入面隻貓咁，當你自信能夠將1 LV的老鼠玩弄于股掌之間，點知轉角原來有隻100 LV的老虎狗喺度等緊你。所以玩魂系列絕對係個慘痛的經歷，個人亦唔太喜歡。不過基於對《Bloodborne》哩種獵魔題材的喜愛，上述的"童年陰影"絲毫冇影響到我對本作的熱情，特別係遊戲相對上冇咁難玩喇(我覺得)。



6. The Witcher 3: Wild Hunt | 平台: 多平台
嬴盡各項大獎的年度遊戲，其龐大的對白內容及豐富的任務叫人難以挑剔。只係哩類傳統歐美ARPG的實在好難玩出太多新花臣。



5. Gears of War Ultimate Edition | 平台: X1
提到本作，可能唔少人第一時間會唸起「買一送四」的推擴優惠，其實《Gears of War Ultimate Edition》的意義遠比"合集"要深幾個層次 — 佢不旦將第一代高清遊戲標桿以次世代的畫面標準重新製作，更以60幀去定義系列多人遊戲的新方向。以一款賣二百幾蚊的翻炒作品黎講，Gears UE的性價比比起市面上任何一款同類產品都要高。喺多人遊戲主導的大環境下，本作的重生更可以為時下廠商示範 — 一款成功的射擊遊戲所具備嘅條件。(特別係單人遊戲)



4. Forza Motorsport 6 | 平台: X1
目前家用機最好的賽車模擬遊戲，由車輛數目，到賽道再到每一部賽車每一場賽事的精彩語音介紹，都深深感受到製作人對賽車的熱情及喜愛，繼而不斷感染玩家。我亦相信一般玩家玩完Forza 6之後會明白到點解MS肯花一億美金去研發X1手掣。



3. Rise of the Tomb Raider | 平台: X1/X360
或者PS4玩家會想打鑊我都唔定，事關哩隻羅拉我本身就冇乜興趣，所以係咪Xbox獨佔都冇咩所謂。但見MS難得重金包起佢一年，感覺唔玩又好似嘥咗少少咁。唔知係咪因為冇期望的關係，遊戲出奇的好玩，雖然本人有玩過13年嗰部前作打底，玩起上黎亦大同小異，但無阻《Rise of the Tomb Raider》成為一款精彩的作品，其整個流程設計以至別出心裁的古墓解迷都要比前作出色得多，故事發展到後期更有點衛斯理的味道。



2. Batman: Arkham Knight | 平台: 多平台
作為Arkham系列最終章(?)，本作在Batmobile的比重已經超過一般主線任務。著重格鬥/解迷的玩家難免會覺得有點妹仔大過主人婆，不過整體上遊戲係冇問題嘅。尤其是故事鋪排相比唔少大作所謂的"大結局"都要好。



1. Splatoon | 平台: WiiU
每當新一世主機上場，玩家們都會不約而同地討論某某王牌IP的次世代續作，但回首上一代家用機時代，最炙手可熱的都係較新的品牌，《Splatoon》就係今年一款最成功突圍而出的新星。玩家所見唔再係暴力廝殺，而係混入咗老任特色的射擊作品。其中遊戲意在利用油漆搶地盤的設定，成功擺脫坊間流行的TDM風氣之餘，亦做到免傷和氣之風。講到尾創新並非難事，難在點樣將眾多零碎的設計結合成一件偉大的成品，當我首次進入遊戲中的廣場時，眼見一大班身穿日本潮流服飾的魷魚好似行天橋咁表現自己，我就知道《Splatoon》絕對係款野心極大的作品，亦輕易成為我心目中的2015年GOTY。

@肥狗仔@

2016年最期待遊戲(已公佈)排行榜

18. DOOM | 平台: 多平台
系列重啟作品，喜歡打怪獸的本人實中。



17. Sea of Thieves | 平台: PC/X1
Rare被MS收購後一直喺度做二打六角色，今次哩隻《Sea of Thieves》算係叫人眼前一亮的作品喇。



16. Fable Legends | 平台: PC/X1
由公佈到公測，由付費到free2play，本作一直活喺延期的陰霾下。若果16年真係出到，以現時的實機片段，應該都可以試吓嘅。



15. Horizon Zero Dawn | 平台: PS4
Guerrilla Games操刀的首款RPG作品，自E3公佈後憑著獨特的世界觀及高品質的畫面得到各方高度關注，但大家如果仲記得其實10年前Guerrilla Games果款自稱"Halo Killer"的《Killzone 2》，在公佈時同樣羸來一遍"wow……………..."，但結果遊戲本身並冇獲得太多掌聲。至於PS4首發時的《Killzone Shadow Fall》更被評為雷作。前車可鑒，我都係抱住雙重觀望。



14. The Tomorrow Children | 平台: PS4
有玩過Q-Game之前嘅獨立作品的話，應該會比較期待哩隻《The Tomorrow Children》。



13. Ratchet & Clank | 平台: PS4
Insomniac Games在X1上面開局失利後好快回歸PlayStation懷抱，那怕《Ratchet & Clank》係當年1代的重製版。但就好似Gears UE一樣，哩個年頭有人肯重製都應該支持的。



12. Final Fantasy XV | 平台: PS4/X1
通常哩啲遊戲就算冇乜興趣，最後都要買黎玩吓。老實講哩家日廠仲有幾多可以好似FF咁以3A大作的規模去開發的?



11. Paragon | 平台: PC/PS4
EpicGames除咗Gears of War之外，其他作品都係玩得過嘅，黎緊哩款MOBA相信會係另一款唔錯的遊戲。



10. NieR: Automata | 平台: PS4
PlatinumGames的日系動作遊戲，有人會唔期待的嗎?



9. Zelda U | 平台: WiiU
首款open-world的薩爾達作品，好玩就緊架喇，但官方至今未有釋出太多新消息。



8. ReCore | 平台: PC/X1
開發陣容異常強大的遊戲，本作由Halo及Metroid班底打造，並由稻船敬二領軍。當中以核心為機械同伴改造身體的概念十分有趣。話雖如此，遊戲仍然未有實機片段...



7. Star Fox Zero | 平台: WiiU
今年四月老任將會派Star Fox去迎戰X1同PS4的兩家大作，喺我眼中StarFox絕對有哩個資格去挑機。



6. Scalebound | 平台: X1
雖然神谷英樹之前隻《The Wonderful 101》個人十分喜歡，但無可否認哩個光頭佬每部作品的風格都有著根本上的分別。所以對於哩隻《Scalebound》我暫時都係抱著觀望態度。當然睇片就感覺OK嘅。



5. 食人大鷲TRICO | 平台: PS4
由期待到等待，上田文人花近10年打造的Trico可謂幾經波折終於確定2016年推出。本人肯定一出即買，但已經唔係好激動嗰種喇。



4. Uncharted 4: A Thief's End | 平台: PS4
由二代開始發市的Ucharted系列今集講明係最後一集，所以點都要買黎玩吓，雖然都睇死佢係玩嗰類野。



3. Gran Turismo Sport | 平台: PS4
與玩家心目中的GT7可能有點距離，不過話哂都係新作啦。官方就聲稱2016年第一季有公測，而遊戲就可以年內推出，咁...即係暗示可能要等多兩年???XDDD



2. Gears of War 4 | 平台: X1
早排玩《Star Wars Battlefront》 Beta時侯發現該遊戲採用咗Gears嘅active reload設計，事實上我覺得哩家先有遊戲肯起用active reload實在有點匪而所思，始終Gears of War 1已經係9年前的產物，而我地知道哩9年黎普遍的TPS以至部份FPS都離唔開Gears的框架。至於系列最新一集《Gears of War 4》則確定2016年假期推出，希望喺延續前作成功的同時，該遊戲亦可以將TPS領域推展至另一階段。



1. Quantum Break | 平台: X1
有玩過《Max Payne》或者《Alan Wake》的朋友會發現，Remedy所打造的作品都會有一種黑白色的基調滲透於遊戲的每一個角落，而《Quantum Break》亦承繼了哩份獨特的性格，更加入嶄新的時間控制概念，相信會為玩家帶黎另一經典。(BTW 早前Remedy暗示會有《Alan Wake 2》，希望唔洗等到XBOX TWO)



**2016年無疑係主機大作的當造期，但若果你係一位機迷，相信你都會滿意2015各廠的遊戲陣容。喺黎緊一年，遊戲界將會迎來VR時代，而老任亦預計會推出NX次世代主機，究竟16年會係業界動盪的一年又還是飛躍的一年呢，就等我地拭目而待吧。

阿定

Splatoon 第一，真係實至名歸
(Post76 Android 手機版送出)

s1011125

Splatoon 真係正,岩岩買wiiu,完全停唔到手,本身玩緊cod都放埋一邊
另外wiiu最近出個隻幻影異聞録♯FE 都好正,可以話係近年少有用心做既jrpg(雖然人設問題,令我更期待P5)
同埋ching買左xenoblade x 未?雖然仲未開波玩但我覺得應該幾正

player

@肥狗仔@ 發表於 2016-1-2 18:03
2016年最期待遊戲(已公佈)排行榜

18. DOOM | 平台: 多平台

最期待 2016 年遊戲 .....第 4. Uncharted 4 : A Thief's End{:9_428:}

[YoutubeHD]BD9dJZ6Dgx4[/YoutubeHD]

2016 年 4 月 26 日發售{:9_428:}  

http://news.softpedia.com/news/u ... ty-dog-498352.shtml

@肥狗仔@

s1011125 發表於 2016-1-4 16:17
Splatoon 真係正,岩岩買wiiu,完全停唔到手,本身玩緊cod都放埋一邊
另外wiiu最近出個隻幻影異聞録♯FE 都好 ...

我都係哩幾個月先開始清WiiU的game。下個目標可能係Mario Maker或者Xenoblade X...

本來上年好多game都想試，忙裡偷閒，總算最想玩嘅已經玩哂，Splatoon係個驚喜，再一次證明老任唔一定要起用"御用演員"去做遊戲，只要設計得當，原創作品配原創角色都可以好成功。雖則話PS4/X1已經發售咗兩年，但論獨佔遊戲的整體品質都係WiiU技勝一疇。我唸應該冇咩人會話WiiU好成功，但如果佢可以承倒哩兩年嘅氣勢，今年NX應該會比到玩家更大吸引力，至少肯定會有Splatoon續集先。

@肥狗仔@

player 發表於 2016-1-4 16:28
最期待 2016 年遊戲 .....第 4. Uncharted 4 : A Thief's End

[YoutubeHD]BD9dJZ6Dgx4[/You ...

哩集出完就係一個時代的終結喇。我成日覺得既然Naughty Dog有能力做出Uncharted 2/The Last of Us哩啲作品，咁其實可以將目光放遠啲，嘗試其他題材，反正佢間工作室個名已經響哂，出乜都肯定一呼百應(加上SONY的宣傳)。

@肥狗仔@

"2016我最期待遊戲" 第六位話咁快就要下架喇。PlatinumGames岩岩宣佈《Scalebound》延期至2017年，原因都係精益求精啲fd啦。如此一來X1今年又少咗一名大將。希望遲吓E3會公佈多啲獨佔新作啦(Forza Horizon 3都好)，我唔想見到除暴戰警哩啲當大作。

來源
http://platinumgames.com/2016/01 ... he-scalebound-team/


*話說過多一個月就係PlatinumGames成立十週年，想當年由一間"明星隊"公司發展成今天日廠的中流砥柱，我喺度祝PlatinumGames下一個十年能夠成為遊戲發行公司，唔洗再將自己的IP流入別人田。

googleli

Splatoon 我買左到而家仲未拆，係時候喇。 個人選的話Top 3
1. Bloodborne
2. The Witcher 3: The Wild Hunt
3. Rise of the Tomb Raider

Will

今年雖然買左PS4, 不過工作太忙, 唔係玩過太多game
全年玩得最多又好滿意真係splatoon, xenoblade x