新手電處初體驗（平衡式隔離牛）

加里

小弟今次出Post因想分享下電處初體驗的曆程，所以前段文章比較長，如果想直接睇開箱可以跳過

又初踏2聲道到玩釘腳釘墊腳架，而家正式要去體驗電的威力，之前問人，扒文，搵資料開始明白玩電除咗換電源線外，供電，濾波，電流雜訊都係一門好高深學問，而且只要方向正確，加小小野都會得到正面效果（迷之聲：廢話，有邊個唔知阿媽係女人⋯ ）半年前已開始意識到有問提，開始諗係唔係電源問題（傳送門：初入兩聲道的生路曆程 ）

但點樣先知道自己套系統有咩真正不足，正所謂無比無傷害，一切從聽完朋友套HiFi開始，同一首歌聽到背景好黑好靜，聽到更多尾音，更多細節，音場更闊，大家可能話成套HiFi唔同一定會有分別，但當朋友拆走地盒電處等等補品後再AB比較就知發生咩事，就係咁小弟開始著手搵原因。朋友套機有地盒，隔離牛同拖板，而我就咩都無，比下去係必然，但都想拉近同音樂的距離，不過見到又農夫，又isotek，一諗起知價錢就真係怕怕，而且為左要拎到財政大神批文只好又努力扒文，問人，搵資料，希望可以用比較平的價錢換取批文

係睇左咁多資料後最後都係決定先買隻隔離牛，原本想跟之前幾位師兄提議平平地去淘隻牛返嚟用，不過都係擔心運嚟香港時會唔會有咩意外，所以都係香港買。而目標係眾品牌價錢同型號中就
鎖定左左新加坡推出的 Plixir Cube-8 BAC同台灣Keces BP-2400，因為兩隻價錢比較接近又夠力比晒小弟成套前後級用。

搵晒資料儲夠銀彈而家就只欠批文 ，不過世事真係好難預料，就係8月8日去音響展一心想見識下天價音響同想問下代理有關隔離牛的事時行到去Keces代理到見到新出左隻隔離牛Keces IQRP-1500，外型似BP-1200，但就多左兩個會顯示電流的數字錶，雖然電流數字錶家中都有一隻，但裝左係面板到覺得特別靚仔有型 ，而且加入左新的量子共振技術（忽然聯想到台灣第二隻品牌Telos量子技術）可惜係只有300VA+1200VA,唔太適合小弟套系統，聽老闆講對上仲會出IQRP-3500，不過價錢就 ⋯同老闆傾左一陣佢都話BP-2400係最適合我要求，同時又比我知道個壞消息，就係BP系列停產 ，會由IQRP代替（連個天都咁對我 ），如果無Keces就得返Plixir一隻，咁都好，唔洗再考慮咁多，不過老闆再講而家舖頭仲有一隻BP-2400，原本有客人要左，不過個客人見到新出隻IQRP就唔要BP-2400轉左買隻新野，如果你要可以平D比你，有得平我馬上兩眼發光 ，不過批文⋯係呢個時候身邊位大人講：「如果真係想買就買啦，而且有得平，你帶我嚟音響展都估你唔會只係行下睇下唔買野架啦⋯」真係好似坐過山車咁峰迴路轉，難得聽到呢句點會唔去馬丫 ，係比訂金時老闆知我上次都係買左停產後級Keces S125 最後一隻，今次又係買最後一隻再計平多小小比我齊頭數，果下真係開心到暈 。

之後就同老闆約時間上去拎機，同買左幾條電源線比前後級用，因為有一條係要英式頭去20A比BP-2400用要訂做，所以老闆話D線同機到時一齊拎，仲可以幫我煲定D線等一返去直接有得用。

到拎機果日上到去又請教左老闆好多野，又問左有關降噪機的事，本來心思思想買隻Mini Q（人稱手流彈的小型降噪機）老闆就話新出隻Macro N，比手流彈效果更好，而且剛剛返左貨，價錢平過隻QNR，又有佢7成功力，見你買咁多野如果你要計你平D⋯一聽到呢句，心大心細諗左一陣⋯最後都係乖乖比錢帶埋佢返屋企 。

以上就係小弟買電處的過程，以下就係不專業開箱。

一大袋電線加隻25KG重牛


條電線成隻手指公咁粗⋯


先幫所有野嚟張大合照先


到主角開箱，呢箱野重量真係唔講得笑⋯


箱中箱，呢到紙皮加起來都唔輕⋯


見到原裝美式20A電源線同說明書


25kg要拎佢出嚟一D都唔易


主角出場


全美式頭


點解隻環牛唔方正中呢，如果放正中用3粒腳都平衡到麻


今次隻原裝腳又膠升級左鋁合金同像膠墊，感覺唔洗加墊都得


其他電源線合照


由牆插去隔離牛用左Harmonic Technology III AC10重量級電源線（單晶銅）頭尾改左做英式牆插同20A頭，1m



由隔離牛去兩部後級都係用Harmonic Technology III AC10重量級電源線（單晶銅）不過就長D，1.8m


由隔離牛去前級DAC就用Harmonic Technology Florida訊源專用電源線（單晶銅）1.8m


AC10同Florida比明顯粗好多


最後就係新出的量子降躁機Telos Macro N



成隻都係鋁合金CNC車出嚟，非常好手感



Made In Taiwan係好重要


老闆話要發揮最大效能一定要全接L線，如果反相就無咁有效，所以機身同原裝線都有L標誌



因為直插牆身，所以用左隻已反相的英式轉美式轉插，轉插上都有標示L位


隔離牛上架，真係年紀開始大，一個人搬隻牛去架底都差D唔夠力


插上電源線


因線材都有一定重量，所以都加隻線架比佢頂住，無咁傷插頭插座



最後插上總龍就可以位歸


完成


不過因為AC10線身好粗同好硬，非常難走線，我要搬開左邊個防潮箱先走到線，比大執一次房仲辛苦，執好晒成個人散晒，攰到只開著隻牛比佢煲機比就去訓 。

音響器材向來都係要煲下先會好聲，後級最少都要成開成個鐘先開始好聲，咁大隻牛煲足一日隻牛應該入狀態，一於第二日先試聽。


第二日放工就一支前飛返屋企試聽 ，首先就未接上Macro N前，只用隔離牛試聽一下。

首先聽人聲，我用歌莉雅去試，一開聲比未用隔離牛前好似升級左成套機咁，背景靜左，聲音變得好通透，人聲更鮮明清脆，比之前聽到更多的細節，尾音去得更盡，聽到我起晒雞皮，一個字～爽 。

再嚟試聽低音，我用左星球大戰去試，一開聲果種澎湃，令我有重錯覺以為多左隻重低音係房，低頻線條，每種樂器紋理清晰明確，音場同密度更好，低音下潛更深，而且比次前聽果陣感覺樂器數量多左，再試隻太鼓，鼓聲輪廓浮凸清晰，擊鼓之間果種短速感同強弱起伏更好，聽得出打鼓果種力度，果種震撼唔知點形容好 。就咁一試就兩個幾鐘，差D唔記得插返隻Micro N再試⋯

最後插上Macro N後再聽返之前試機的音樂，感覺到效果有一定提升，但無第一次試隔離牛咁震撼，主要覺得背景更黑更靜，音場再闊多小小，結像同聲音再清晰D通透D，而高低頻唔覺有被削減CUT頻，聲音依然包滿，話雖係無第一次用隔離牛聽果下分別咁大，但用左隔離牛後都仲聽得出Macro N對聲音有一定提升，有D想試下唔用牛只用N仔會聽到幾大一變化，不過一諗起還原走線要搬咁多野就放棄左呢個想法，因為都真係幾攰⋯

以上就係小弟的聽感分享

raylee

恭喜有新野玩

國大代表

師兄，音響器材是否已經搬了出廳享受

加里

國大代表 發表於 2021-8-21 09:38
師兄，音響器材是否已經搬了出廳享受

長放就冇可能, 不過因為套機放左係有轆的機架上, 屋企人出晒街時間唔中推出庭聽半日嘆下都仲可以

koalaau

用隻有質素的牛，背景係會較靜和好力，連帶弱音和動態都好左。一牛幾部機同時受惠，計效益高過買條貴價電源線。

加里

koalaau 發表於 2021-8-21 18:16
用隻有質素的牛，背景係會較靜和好力，連帶弱音和動態都好左。一牛幾部機同時受惠，計效益高過買條貴價電源 ...

係，加左牛聲音提升得好明顯，聽得好開心，不過因為要一次買多4條電源線，果4條線我唔夠膽上報買左幾多錢，只係話因轉左美式頭，所以一定要換左幾條錢咁輕輕帶過就算 ，今次買牛買線覺得好超值。

koalaau

我情形係隻牛靚的話，之後的電源線影響冇咁大，唔知師兄係點？

raylee

加里 發表於 2021-8-21 19:18
係，加左牛聲音提升得好明顯，聽得好開心，不過因為要一次買多4條電源線，果4條線我唔夠膽上報買左幾多錢 ...

如果你鐘意玩電，咁多野又係PETER度買

下一步就換埋電箱啦，你會覺得更加超值

加里

koalaau 發表於 2021-8-21 21:39
我情形係隻牛靚的話，之後的電源線影響冇咁大，唔知師兄係點？

我係因為去朋友屋企AB比較試聽過有無牛的分別先決定買牛，所我都好認同靚牛出到乾淨的電對聲音好重要，電如果唔乾淨，雜訊多，再好的電源線幫助係有限。
所以我開始明白點解個個聽HiFi買完套機之後一定係攪電先，攪完電之後先慢慢玩訊號線同喇叭線

加里

raylee 發表於 2021-8-21 23:09
如果你鐘意玩電，咁多野又係PETER度買

下一步就換埋電箱啦，你會覺得更加超值 ...

電箱應該唔會攪住，如果攪得電箱一定會好想整條獨立線，但全屋做晒入牆喉，而家做獨立線一定係明線，無可能會比