賣機遇上支票黨

Benip

今日賣機差啲比支票黨呃走部後級，所以請各師兄賣野最好現金交收，事情大概係咁的，FB有個買家聯絡我，傾好晒所有野，約左時間交收，中途佢話屋企有白事唔方便去人地屋企，所以搵朋友黎交收，我問佢係咪現金即場交收，佢話會去櫃檯攞現金之後去存款機入數比我，因為金額成4萬幾，咁可以啦，唔係入票就得，交收前佢重入左$100比我，話認證下戶口岩唔岩，我手機收到現金存款信息，之後我上銀行APP睇，係有數的，存入途徑顯示現金存款機，咁OK啦，佢朋友到左，我推落樓搵佢朋友，去到後原來果個唔係佢朋友，只係普通叫車司機，都唔緊要，我話等果邊入左數我先抬機上車，轉頭又收到現金存款信息，我冇開晒黎睇，只係通知欄睇到，跟手我入銀行APP查數，見都條大數後就抬機上車，準備放佢走，但我由中段時間已經有懷疑心，所以再入APP睇，點知條大數存入途徑係交易票而唔係現金存款，我即時叫停司機等一陣，我話有啲問題，等我打去問清楚咩事先，打去已經冇人接，之後果邊用另一手機打比司機問開車未，佢哋以為我咁抬機上車應該已經放走左部車，我叫司機比個電話我，我直接同佢講，問佢咩情況，點解會係交易票，佢死口話係玩金存款，重話可以發張存款收據我睇，我話唔需要喇，我只信自己銀行APP，機我就落返車嫁喇，您同司機自己攪清楚點處理，如果年紀大既師兄又或者冇用銀行APP既師兄，絕對好高成數會被騙，所以大家要小心

n00brx

師兄應該咁諗：抬下機就有$100進帳🤣

NM0101

成4萬幾蚊嘅二手機, 唔親身到場驗實物都有d奇怪

littlefat69

多謝提點

Yoshiki2008

師兄差DD就出事，今次真係好彩，遲幾秒開左車就大獲，以後過數一定要睇清楚先好交收。

nippon

過數免問，費事自找麻煩，現在騙子實在無處不在，大家小心。

raylee

現金同過數我都唔收，只收FPS/PAY ME, ALIPAY

或者個買家係ATM拎現金出黎, 再經存錢機俾我戶口

koalaau

先過一百令人減低戒心，擺明落本搭鷄棚，師兄真機警，恭喜避過
一劫，多謝分享。

marco

呢單嘢個手法同我朋友中計有90%相同，估唔到呢排都多

LoMichael@G

用開間銀行如入票未過數只要看總數同可動用金額。我經常咁check 唔知是否穩陣?