《唐頓莊園》(Downton Abbey) 簡評

阿定

如果你有睇開《唐頓莊園》(Downton Abbey) 電視劇，其實無得唔入場睇呢套戲，因為好少一套電視劇可以去到第六季都唔爛尾，只會越來越好睇，所以電影版一上，就注定要比錢入場睇，由於電視結局已經係大團圓結局，所以今次電影版係一致槍口對外，全個莊園上上下下都好齊心去做好一件事，就係迎接英國國王同女王的來訪。

今次電影版基本上就係電視版的後續故事，劇情緊接電視版結局，搬到大銀幕當然就所有野都變得更華麗了，不過劇情就變得無咁複雜，方便大家唔駛點用腦去睇，不過就勁多支線，絕對唔會悶，Crawley家族入面每個角色，上至伯爵母親Violet Crawley太伯爵夫人，下至廚房女工Daisy，每個人都有自己的小故事穿插整套電影，劇中除了大量笑位外，音樂亦超級讚，絕對會有睇完都仲未夠，想佢拍多兩集電影的感覺。